ກ່ຽວກັບ ບົດລາຍງານຄວາມສະດວກໃນການດຳເນີນທຸລະກິດ

ບົດລາຍງານຄວາມສະດວກໃນການດຳເນີນທຸລະກິດຂອງກຸ່ມທະນາຄານໂລກ ໄດ້ນຳສະເໜີບັນດາມາດຖານກົດລະບຽບ ທີ່ຄຸ້ມຄອງພາກທຸລະກິດ ແລະ ມີຜົນບັງຄັບໃຊ້ໃນ 190 ປະເທດ ແລະ ຂົງເຂດເສດຖະກິດໃຫຍ່ໃນທົ່ວໂລກ.
ບົດລາຍງານນີ້ໄດ້ສະແດງໃຫ້ເຫັນສະພາບແວດລ້ອມຂອງການດຳເນີນທຸລະກິດດ້ານນິຕິກຳ ແລະ ຂັ້ນຕອນຕ່າງໆ ວ່າມີຄວາມຍາກງ່າຍແນວໃດ ດ້ວຍວິທີການເກັບກຳຂໍ້ມູນ ແລະ ການວິໄຈລົງເລິກ ເພື່ອປຽບທຽບສະພາບແວດລ້ອມຂອງການດຳເນີນທຸລະກິດໃນຫຼາຍປະເທດ.
ຕໍ່ບົດລາຍງານດັ່ງກ່າວນັ້ນ, ໄດ້ເຮັດໃຫ້ບັນດາປະເທດຕ່າງໆມີການແຂ່ງຂັນເພື່ອປັບປຸງບັນດາລະບຽບການ ແລະ ກົນໄກປະສານງານໃນການດໍາເນີນທຸລະກິດໃຫ້ມີປະສິດທິພາບ. ຊຶ່ງ ສປປ ລາວ ກໍ່ໄດ້ອອກ ຄໍາສັ່ງ ເລກທີ 02/ນຍ, ລົງວັນທີ 1 ກຸມພາ 2018 ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດໍາເນີນທຸລະກິດຢູ່ ສປປ ລາວ ເພື່ອສຸມໃສ່ປັບປຸງບັນຍາກາດໃນການດໍາເນີນທຸລະກິດຢູ່ພາຍໃນປະເທດໃຫ້ດີຂຶ້ນ ແນ່ໃສ່ຍາດແຍ່ງ ແລະ ດຶງດູດເອົາການລົງທຶນທີ່ມີຄຸນນະພາບ, ຊຸກຍູ້ສົ່ງເສີມ ແລະ ສ້າງຂີດຄວາມສາມາດໃນການແຂ່ງຂັນຂອງທຸລະກິດພາຍໃນໃຫ້ສູງຂຶ້ນ.

ບົດລາຍງານການດຳເນີນທຸລະກິດປະເມີນຫຍັງ?

ເພື່ອເຮັດໃຫ້ຂໍ້ມູນສາມາດປຽບທຽບກັນໄດ້, ການປະເມີນໄດ້ກໍານົດກໍລະນີສຶກສາ ແລະ ມາດຖານສະເພາະ.
ໂດຍເນັ້ນໃສ່ການຈັດຕັ້ງປະຕິບັດ ບັນດາລະບຽບການທີ່ກ່ຽວຂ້ອງ ກັບວົງຈອນຊີວິດຂອງ ການດໍາເນີນທຸລະກິດຂະໜາດນ້ອຍ ຫາ ຂະໜາດກາງ.
ຢູ່ຕົວເມືອງທີ່ມີເສດຖະກິດໃຫຍ່ສຸດໃນປະເທດ ແລະ ເມືອງທີ່ມີເສດຖະກິດໃຫຍ່ອັນດັບສອງ ສໍາລັບປະເທດທີ່ມີປະຊາກອນຫລາຍກວ່າ 100 ລ້ານຄົນ ໃນປີ 2013.